السبت، 2 أكتوبر، 2010

حَدَرجه بَدَرجه من كل عين دارجه !!!!

تحدى الديرينج بيكرز؟؟؟؟؟ أزرق.... ايه ده...دقة زااار و الا شوجار كوكيز؟؟؟
يا نهار ابيض.. و كمان بخرف؟؟؟؟
تحدى الشهر اه كان عن الشوجار كوكيز و ده نوع مشهور جدا فى بلاد الخواجات و بيتعمل فى كل المناسبات السعيده و بيتزوق كمان بعجينة سكر بكل الألوان و كمان الأشكال يعنى لا تستبعدوا اى شكل ما تعملش... و الله حتى القبيح منها و اللى الواحد ما يصحش يقوله فى هذا البلوج المحترم و المحتشم و شدوا تحت محتشم خطين.
طيب الابداع كان فين كان فى التشكيل الست اللذيذه صاحبتنا ماندى و اللى استضافت الحدث قالت شوفوا شهر سبتمبر يعنى بالنسبه لكم ايه و بعبروا على راحتكم... و راحت كل الجماهير تبعبر و تبعبر و انا الغلبانه عياااااانه......عيااانه اوى......راقده بتشال اكل و اخد الدوا و اتحط تانى.....عندى ايه....... معرفش......صداع و الام رهيبه فى الفم و عضلات الفك جعلت من الطعام مهمه مستحيله و الحديث مجرد خطرفه.....
يا عينى ياختى عليا... و بعدين من الدكتور ده لده لده و كله مش عارف السبب .. و بعد كعب داير على جميع التخصصات....جاء الأخير بتفسير حاولنا اننا نصدقه... قال انا من كتر ما انا عصبيه """قال عصبيه قال" فين العصبيه دى طيب و انا ساكنه فى الريف النمساوى...مش عارفه ؟
ترف بجد...قال من العصبيه عضلاتى بتنقبض فضربت عضلات كتافى فى عضلات وشى و بالذات بقى.....يا جماعه اشمعنى بقى؟؟؟ برضه معرفش.
و بعد كل القلق و الجلوس ساعات و ساعات عند الدكاتره ذهب المقربون منى الى تفسير اخر يخفف عنهم الحيره اللى هما فيها... و كان التفسير الميتافيزيقى للى بيحصل لى ان ده ح س د........حسد؟؟؟ مين هيحسد....ده حتى احنا شعب طيب و بنطلع كل طاقاتنا السلبيه فى الانتاج و منافسة الذات.....حسد ايه معاذ الله....اللى بيحسدوا بس هما الجماعه اللى ما يتسموش بتوع الصين و العياذ بالله....هههه
و من كتر اللت و العجن و لما الشهر خلص و كنت خلاص اخدت قرارى انى مش هعمل التحدى حاجه قالت لى قومى طلعى غلبك فى حاجه..كافحى الألم بالتعب و العمل.....قمت و مش عارفه موضوعى بتاع البسكوت هيبقى عن ايه؟؟؟
و كان........كان عن الحسد...أخدت الكاميرا و رحت سيدى المرسى ابو العباس لأول مره منذ 13 سنه صورت المولد و المراجيح و اشتريت بخور و عين العفريت و اتضحك عليا طبعا فى الأسعار على اساس انى سايحه وافدة من جواتيمالا .
الكوكيز بتاعتى كانت كفوف و خمسات و عيون زرقا........
وصفه الكوكيز كانت كالتالى:-
400 جرام دقيق
200 جرام زبده
200 جرام سكر بودره
بيضه واحده
اضربى الزبده مع السكر ضيفى البيضه و بعدين قلبى فيهم الدقيق طبعا حطى شويه فانيليا مع البيضه.
حتى تحصلى على عجينه متماسكه..حطيها فى التلاجه و بعد نص ساعه افردى و قطعى بالقطاعات اى شكل تحبيه.
اخبزى على درجة حراره 180.
و بعد ما يبرد اعملى مقدار رويال ايسينج او زينى بعجينة الفوندان الأشكال اللى تحبيها.
بس خلاص..
يالا على الصور يا حلوين...
سؤال أخير....
جائزة قيمة للى هتقول لى يعنى ايه...حَدَرجه بَدَرجه من كل عين دارجه؟؟؟؟؟؟
الجايزة هتكون أكواب معياريه..."measuring cups من مطبخ شهيره...يالا بينا
شهيره داود

الأحد، 12 سبتمبر، 2010

باستا فلورا بالاسكندرانى !!


باستا فلورا اختراع سكندرى مستوحى و محرف من الاختراع الايطالى الاصل "pasta frolla و بالدراسه و البحث و التقصى رغم ان اختكم نص نص فى الايطالى لقيت ان الباستا فرولا هى نفسها عجينه الشورت بريد او التارت بالايطالى طيب ايه حكايه الباستا فلورا الاسكندرانى دى و اللى لا هى كيكه و لا هى تارت.....يعنى حاجه وسط بين الاتنين..الاسكندرانيه الافذاذ لما نقلوها من طنط ماريا الايطاليه غيروا مكان الحرف من باستا فرولا الى باستا فلورا... لا كمان تخنوا الكراست لدرجه تجعله ينتقل من مجرد انه تارت او كراست لتارت الى انه يكون شئ اشبه بين الكيك و كمان التارت...طيب خدوا المقادير دى و جربوا و افردوا العجينه رفيع..هتحصلوا على عجينه تارت....طيب افردوا تخين اوى هتطلع المخلوق السكندرى اللى اسمه باستا فلورا..بحثى وراها كان لسبب وجيه انى حبيتها و حبيتها اوى و اعتقد مش انا لوحدى دليل طلبات الناس ليا دايما انى انزل طريقتها....
المقادير
2 كوب دقيق
2 بيضه
نص كوب سمن او زبد
من نص الى تلات ارباع كوب سكر بودره
2 م.ص بيكنج باودر
فانيليا
نضرب السمن او الزبد مع السكر حتى يصير كريمى القوام..يضاف البيض بيضه بيضه بالتناوب مع الفانيليا او بشر الليمون او البرتقال او القرفه حسب نوع المربى اللى حابه تضيفيها
كونى مبدعه حيث لم ينزل فى الكتب السماويه اننا نعملها بمربى مشمش او حتى فراوله..ممكن توت ..ممكن تفاح ممكن برتقال و جزر و ممكن كمان بلح انتى او انت و دماغك العاليه و نكهه العجينه كمان مخمخ لها.
هنضيف الدقيق المخلوط و المنخول مع البيكنج باودر. و نخلط هنلاقى عجينه دبقه ممكن نشكلها بايدينا....نحط تلتين العجينه فى صينيه و نفرشها بايدينا و ننزل عليها المربى و نحط تلت العجينه الباقى فى قمع و نعمل الاشكال اللى حابينها ممكن تتخنى العجينه باضافة المزيد من الدقيق لها و تتلجيها و تبشريها على الوش..يعنى افكار كتير و انتى برضه و دماغك العاليه.
تخبز فى فرن متوسط الحراره 180 حتى تاخد لون دهبى متميز.
بس خلاص "أسوة بالمعلم شعبولا"
و كل سنه و انتم طيبين يا كتاكيت.
أرجو منكم ترك تعليق علشان احس انى مش بهاتى لوحدى...مجنونه يعنى و علشان اقدر اقدر مين اللى بيقرا و يستفيد .
أرجو منكم الدعاء لى كمان بالشفاء العاجل علشان صحتى فسكانه اليومين دول و وعد منى انى لما هخف هفترى...ههههه
اشوفكم على خير قريبا ان شاء الله.
شهيره داود

الخميس، 9 سبتمبر، 2010

أه يا ناعمه يا غريبه !!!


أغنيه قديمه من التراث المصرى سمعتها مرة و انا صغيره أثناء حضورى احدى الافراح بالأرياف و كانت الأغنيه طبعا بتشير للعروسه مش للغريبه...الغريبه نوع بسكوت او نوع نواعم من نواعم العيد... و اثناء رحلتى مع المطابخ و الاطباق من بلاد العالم المختلفه كنت اجد لها اشباه بس الغريبه بتاعتنا احنا فى مصر غيييير اى حاجه تانيه و هقولكم ليه.... رغم اختلاف الوصفات بين الستات او الرجاله العاملين او الهواه و مع احترامى لهم كلهم الا ان وصفتى و التى اخذتها عن امى و اخذتها امى عن جدتى الى اخر السلسال...الوصفه دى هى التى افضل مذاقها و اللى بتحسسنى فعلا ان دى هى غريبة العيد بتاع زمان....الوصفه هشارككم بيها هنا هدية منى ليكم فى العيد...

الغريبه ما ينفعش تتعمل بالزبده لان الزبده زى ما احنا عارفين تحتوى على نسبة لبن و انا عايزة دسم صافى علشان الغريبه..لازم هنا استخدم سمنه و بس سواء صفراء او بيضاء المهم انها تبقى سمنه

السمنه هى واحده من تلات مكونات هى كلها من الاخر مقادير الغريبه

يالا

نص كيلو دقيق

ربع كيلو سمنه

تمن كيلو سكر بودره
متواليه هندسيه...ده مش طبخ يا معلمى دى هندزة و الله....ههههه
ندخل فى الموضوع من تانى

اضرب او اضربى السمنه مع السكر جيدا حتى يفتح لونها و تاخذ قوام كريمى

اضيف الدقيق و اعجن و كور كور صغيره و رص فى الصاجات بس اترك مسافه صغيره بين كل وحده و التانيه و ممكن تزين الغريبه بوحدات من المكسرات فسدق او بندق او حتى اللولى اللى بيتباع فى محلات مستلزمات الحلويات.

اخبز فى فرن هادئ بس يجب الحذر تماما لانها بتستوى بسرعه يجب الاسراع من اخراجها من الفرن بمجرد ما تاخد لو ن المستكه.

بس خلاص و كل سنه و انتم طيبين

شهيره داود

عيد سعيد علينا كلنا !!

العيد فرحه و اجمل فرحة...الى اخر الاغنيه المشهوره اللى مش بس مش بحبها لا انا كمان بكرهها و سبب الكره منطقى و وجيه..الاغنيه دى كانت خلفية سخيفه لسلسله اعياد متتابعه لم اشهد فيها الفرحه اللى بتتكلم عنها الاغنيه..قولوا نصيب او حظ عاثر.....بس العقدة دى لا زالت مستمرة معايا لحد ما خلاص هتم 36 سنه قريبا....طيب ايه العمل؟؟ العمل انى لازم اتخلص من الاحساس ده عندى بكل عيد...هخليه فرحه حتى ان ماكانش ليا تبقى لأولادى و زوجى و ربنا يقدرنى....العيد عندى كحك و بسكوت و حاجات حلوة كتير بتتاكل..أغلبها وصفات من ماما طبقتها او اضفت عليها بعض التعديلات...بس خرجت بكوليكشان كل سنه بعملها و بتحوز الاعجاب...الفرحه اللى حسيت بيها بجد لما داقت الناس حاجة العيد و اتصلت بيا تشكرنى على طعم جميل ما داقوهوش حتى فى فنادق سبع نجوم....فعلا فرحت و شكرت ربنا على نعمة من نعم كتير وهبها لى و كان ثناءهم بمثابة مخرج لى من احساس بالعجز و الفشل فى اتمام مشروع طالما حلمت بيه لدرجة انى قررت و علشان اتصالح مع نفسى انى لا اعاود التفكير فيه مرة تانيه...ادعوا لى بالهدايه و الخير.....
و دى كانت تشكيلة العيد السنه دى تجمع ما بين التقليدى و الموروث و بين الحديث و المستحدث...كل سنه و كلنا دايما بخير و بصحة.

السبت، 28 أغسطس، 2010

محتاجين مساعدتكم

صديقاتى و أصدقائى الأعزاء...ان شاء الله و فى الايام المباركه دى محتاجين مساعدتكم و لو بالقليل...فى أسره صغيره معوزة ضاق بهم الحال لدرجه تمنعهم من مواصله الحياه و الصرف على بناتهم الاتنين اللى لسه فى اولى و تالته ابتدائى..الاسره دى عائلها عامل لحام و حداد حاصل على دبلوم صنايع و لكنه لايجد عمل و ان وجد لا يكفى دخله الا الفتات رغم انه مريض بالكبد و تكاليف العلاج و الدواء..انتوا عارفين بقه ..المهم ان شاء الله انا هبدأ حمله لجمع تبرعات لهذه الاسره المعوزة علشان عائلها يقدر يضع اللبنه الاولى لورشه حداده متناهية الصغرمهما كان صغر المبلغ اللى مستعد تتبرع بيه هيكون ليه فايده كبيره علشان نحقق الاستقرار النسبى لهذه العائله و مهما كان... المبلغ صغير الا اننا كثره فى حب الله و حب الخيرو علشان الشهر الكريم خلوا تقربنا الى الله يكون بفتح باب رزق لحد فعلا ماعندوش الحد الادنى من الحياه الكريمه....قرش على قرش هيفرق و يعمل مبلغ كويس نقدر نأسس بيه حاجه و هخليكم متابعين اول بأول و بالصور احنا انجزنا ايه فى مشروعنا....ربنا ييسر لنا الحال يا رب.....لكل من لديه القدره على المساعده ارجو ارسال رساله لى علشان اقولكم هندفع المبلغ ازاى مهما كنت بعيد هنسهل الامر عليك ان شاء الله و الخير دايما هيقربنا ....شكرا لكم و كل سنه و انتوا طيبين .
شهيره داود

الثلاثاء، 24 أغسطس، 2010

قطايف فى الفرن ؟؟....لما نشوووف !!

مش بس قطايف فى الفرن لا كمان استنوا الفرقعه الكبرى...
يالا بينا على الوصفه
قطايف بأى عدد وحدات تحبى.... نص كوبايه زبده او سمنه سايحه
شربات تقيل و للحشو:-
و هنا المفاجعه الكبرى... انا حشيت بخلطة التشيز كيك..ايون و مقاديرها كالتالى
120 جرام جبنه كريمى
نصف كوب سكر بودره
1 و نصف بيضه كبيره
120 جرام كريمه لبانى
و فانيليا او عصرة نصف ليمونه
بنضرب المقادير دى مع بعضها على ان تكون بدرجة حرارة الغرفه.
نيجى للقطايف اللى بندهنها بفرشه زبده من الوش و الضهر و نحطها فى قالب الكاب كيك.. و نصب فيها الحشوة اللى اتكلمنا عليها.
و ندخلها الفرن و بعد ما تحمر الحشوه بلون دهبى خفيف بنطلع القطايف و ننزلها فى شربات تقيل معد مسبقا يعنى بااااارد.
نطلعها و نسيبها تبرد خااالص و نزينها بوحدات كريم شانتى و كل اللى عندك من فاكهه... انا فى الصوره حطيت كل الفاكهه تين و جوافه و مانجه و عنب و بعدين حطى الحوار ده كله فى التلاجه علشان لما بتتاكل بارده احلى كتييير.
و كل سنه و انتم بخير.

ملحوظه مهمه جدا......حابه اوى اشوف تعليقاتكم و اراءكم لأنها هى الحاجه الوحيده اللى بتشجعنى أكمل و أكتب وصفات.
فى ناس كتير مش بتعرف تعلق...
ترك تعليق سهل جدا....هتدوس على خانة تعليقات أسفل كل موضوع و تدخل تكتب اللى عايزه و بس خلاص.
شكرا ليكم ألف شكر مقدما.
شهيرة داود

الاثنين، 2 أغسطس، 2010

تحدى صيفى جدا من الديرينج بيكرز :)))

انهارده جايبه لكم صنف حلو جديد و لذيذ و منعش فى صيف حار جدا !!الطبق ده فكرته بسيطه و حلوة و هو عباره عن بوله سويس رول و محشيه ايس كريم بالنكهه اللى تحبيها
السويس رول:-
المقادير 6 بيض كبير
1 ك سكر بودره
10 ملاعق كبيره دقيق
فانيليا
2 م.ك ماء مغلى
الطريقه:-
اضربى البيض مع السكر جيدا على ان يكون البيض بدرجه حراره الغرفه و طبعا السكر شرحه
اضربى لحد ما يبهت لون البيض و تشوفى العلامه ...ايه العلامه دى بقه؟؟؟؟؟ العلامه انك لما تشيلى المضرب و ينزل المزيج المضروب منه المفروض انه يترك اثر يدوم 10 ثوانى..عديهم لو راح الاثر قبل الوقت ده اعرفى ان عليكى مواصلة الضرب مره تانيه.
اخلطى الدقيق برقه و سرعه و بحرص و ده بالتناوب مع مقدار الماء المغلى..سخنى الفرن على درجه حراره 180 و حضرى اناء الخبز و اللى هيبقى عباره عن صاج خبز مستطيل ..هتدهنيه زيت و تفرشى فيه ورقه زبدة..صبى الخليك و سويه جيدا و دخليه الفرن بالسلامه
هيقعد من 10 الى 12 دقيقه اكتر من كده هيتكسر منك و انتى بتلفيه.
حضرى له فوطه و رشى عليها سكر بودره و بمجرد ما يطلع اقلبيه على فرشته.
و لفيه و سيبيه خاااالص و بعد ساعه احشيه و لفى تانى.....انا هنا حشيته بمبربى كريز منزلية الصنع.
ممكن تحشيه بكريمه خفق او ممكن الاتنين انتى و كرمك و فضاااااوتك.
سيبيه فى التلاجه و قطعيه الى شرائح بعد ما يبرد تماما ...هاتى بوله و بطنيها بفويل او ورق بلاستيك... و رصى فيها وحدات السويس رول.. و صبى فى قلبها اى نكهه ايس كريم بتحبيه...ممكن يبقى جاهز او مزيج سريع التحضير او لو بتجيدى عمل الايس كريم اعمليه فى البيت و نوعى فى النكهات و زاوجى بينها كالوان و نكهات على مزاجك.
وصفه مقترحه لايس كريم بالفانيليا
اخلطى 2 و نصف كوب كريمة خفق مع نصف كوب من السكر و الفانيليا و قلبيها بخفه و صبيها فى ماكينة الايس كريم او لو ماعندكيش حطيها فى علبه فى الفريزر و بمجرد ما تبدأ فى التجمد خرجيها و اضربيها بخفه و دخليها تانى ..كررى الخطوة دى مرتين و سيبيه يجمد فى الفريزر.
وصفه مقترحه لايس كريم شوكولاته.....اخلطى 2 كوب كريمه مع كوب سكر مع 3 م.ك كاكاو.. و على نار هادية قلبيها برفق حتى تتجانس كل المكونات و ارفعيها و اتركيها تبرد بدرجة حراره الغرفه..و سيبيها تسقع فى التلاجه و صبيها فى الماكينه او اتبعى نفس التكنيك اللى سبق و شرحته قبل كده...بس خلاص
انا هنا حشيته بايس كريم كريمة الرازبيرى.
يالا جربوها و قولوا لى رأيكم و كل سنه و انتوا كلكم طيبين .

شهيره داود

مقترحات لأطباق رمضانيه فى صيف ساخن !!

بيف ستروجانوف.
بطاطس مشويه بالبابريكا و الزعتر مقدماها مع حلقات البصل .

صلطة كوسه مشويه .


سلطة فلفل الوان و برضه مشوى .بينا ارابياتا .
الوصفات هنزلها تباعا ان شاء الله.... اللهم بلغنا رمضان...اللهم اجعلنا قادرين على حسن طاعتك....كل سنه و كلكم طيبين :)))
شهيره داود

اخر الافتكاسات برضه :)))

أسفه لوى فيتون على التقليد...بس الزبون كان عايز كده :)))
تيراميسو فى كوباية شوكولاته :))

كتيبه الاعدااام :)))
لا يرى بالعين المجرده...هو قلة بس فى كل حاجه :)))

هاللو كيتى كاب كيك باستا فلورا تانىشوكولاته متنوعه :))

الأربعاء، 26 مايو، 2010

تورتة هدير رقيقة زيها !!

هدير اتصلت بيا وقت الردم...ههههه..ايوه فعلا وقت الردم..كنت بعمل عمرة فى شقتى و محتاسه و مكتئبه من الوضع و الحاله التى الت اليها العماله المصريه..يعنى كنت ببيض مع النقاش و بكسر مع عامل الهدم و بركب سيراميك و صحى مع السباك..يعنى كنت اى حد تانى غير شهيره اللى تعرفوها...المهم هدير اتصلت بيا و زفت لى خبر خطوبتها و خبر انها عايزانى اعمل لها كمان التورته بتاعة الخطوبه...طب و بعدين..هدير غاليه عليا رغم انى اعرفها بس من فتره بسيطه .. و المعرفه كانت كورس اخدته هدير فى فن الطهى و بقت فعلا شيف من الدرجه الاولى..المهم ضربت لخمه و قعدت احسبها و أفكر و فى الاخر سبت الصنايعيه و قلت هعملها يعنى هعملها و اهو اخرج من المود الصعب اللى كنت فيه...تورته هدير لازم تكون زيها غايه فى الرقه...هههههههه

ربنا سهلها و انجزتها بس المضحك بجد كانت عيون الصنايعيه و هى بتتبعنى فى كل مكان و لسان حالهم بيقول " هى الست المجنونه دى بتعمل ايه بالالوان و الادوات دى" بس لما شافوا النتيجه ذهلوا و بعدها بقوا يرحبوا بيا جدا و انا بتدخل فى تفاصيل شغلهم بغلاسه شديده.. و الله لو كنت مكانهم كنت سبتنى......ههههههه
يالا على الصور...الف مبروك يا هدير و ربنا يتمم لك بخير.

شهيره داود

أخر افتكاساتى الفوندانيه !!

أخر افتكاساتى الفوندانيه...هههه..حلوة فوندانيه دى و هى نسبه الى الفوندان او عجينة السكر...
اللغه العربيه راحت فى داهيه خلاص...




أفكار حلوة لأعياد ميلاد الولاد أتمنى انها تكون مصدر الهام للبعض اللى بيخطط لعيد ميلاد و مش عارف يعمل ايه.....
انتظرونى خلال يومين..هنزل هنا تحدى الشهر الجديد لمنظمة الديرينج بيكرز..كل مرة و انتم طيبين !!
شهيره داود

ممكن كمان تعجبك المواضيع دى...يالا بينا ...

Related Posts with Thumbnails